1963

Hamalau umerekin ekin genion bideari Gasteizko erdialdeko etxebizitza batean, familia gutxi horien berezko nortasun eta kulturara errotzeak, ilusioak, ametsek eta ahaleginak bultzatuta.

Hasiera zailek ez zuten Gasteizko lehen ikastola sortzeko ideiatik aldendu ikastolari edozein ordutan eta edozein unetan hobekuntza-lanak egiten zizkioten gurasoen kolektiboa.

Ahalegin handiarekin, familia horiek euskara berreskuratzeko mugimenduaren hazietako bat erein zuten hiri honetan, eta, denboraren poderioz, lortuz joan garen nahia: euskara elkarbizitzarako funtsezko tresna bihurtzea, baita gure txikien heziketarako ezagutzen, esperientzien eta balioen igorlea ere.

1968

Estibalizko hiribidean, Izaskun Arrueren ondoan, hamalau familia haiek, beren ausardia, lan eta pertseberantziari esker, gaur egun geure euskal kultura eta nortasunari eusteko eta bizi garen gizartea aberasteko abagunea ematen digun bide atsegina urratzen jarraitu zuten.

Jatorrizko izaera berritzaile eta kooperatibistari leial izanik, Gasteizen izan nahi eta behar genuen ikastola hazteko edozein zailtasun aukera bihurtzen genuen. Eta horrela, azkenean, klandestinitatetik ateratzea lortu genuen, Colegio Padre Raimundo Olabide izenarekin, gaztelaniaz oraindik. Eta jolastokirik ez genuenez, etxeko baratza jolasleku bihurtu genuen.

Gaur egun ere, harrotasunez esaten dugu Olabideko haurrek "baratza" jolastokiarekin lotzen dutela eta "txalaparta"ren soinua, ikasgelan sartzeko edo etxera itzultzeko unearekin.

1973-1983

1973an, funts ekonomikoak bazkide-babesle gisa bildu ondoren, gaur egungo guraso-kooperatiba sortu zen. 496 ikaslerekin, Lasarte inguruan erositako 20.000 metro koadroko lursailean, gaur egungo Olabideko lehen eraikina eraikitzen hasi zen. Handik urte batzuetara, Alberdi eta Zelaia Eraikina eraikiko ziren.

Erronka handiak gaindituta, kooperatibisten, errektoreen eta bazkide babesleen lankidetzari eta gogoari esker, eta baita euskal erakundeen ekarpenari esker ere, Izaskun Arruek gidatutako esperientzia aitzindari hura errealitate bilakatuz joan ginen.

1984-2021

1.000 familiak baino gehiagok, 1.600 ikaslek eta 200 bidelagunek osatzen dute Olabide familia handia.

Gaur egungo munduak eskatzen dituen erronketarako prestatuta, Arabako gizartearen eragile aktiboak gara, eta euskara eta euskal kultura sustatzen jarraitzen dugu.

Jatorriko espiritu berritzaile berarekin, Olabideko Hezkuntza Proiektuaren eraldaketan inplikatuta gaude, errealitate desberdinen gaurkotasunera egokituz eratuz eta berrasmatuz doana. Gure txikiak eta gazteak dira guztiaren muina, eta gogotsu lan egiten dugu haiek balioetan hezteko eta haiek eraikitzea erabakitzen duten munduan bidea egiteko tresnak izan ditzaten.

Mundutik Olabidera... eta Olabidetik mundura!